За успешно да се спроведуваат онлајн услугите на болниците, менаџерите треба да имаат јасна стратегија за дигитализацијата, да ги истакнат докторите кои лесно ги прифаќаат промените и да го подготват и ангажираат персоналот.
PLX Academy · Човечки исксутва · 2 Декември 2021
Потребата за онлајн консултации со докторите драстично се зголемува, заедно со другите елементи на дигитализацијата во здравството: роботика, вештачка интелигенција и дигитални платформи, Ковид-19 го забрза овој процес. Во светските болници, онлајн услугите се покажаа како безбеден и ефикасен начин, за комуникација со пациентите. Во Cleveland Clinic, за време на пандемијата, 80% од посетите на пациентите се направени преку интернет.
Студиите за искуствата на пациентите, базирани на анкети, покажуваат дека различни популации на пациенти имаат позитивни искуства со “виртуелните посети на доктор“, на исто ниво како и со вообичаените посети. Исто така, најновото истражување на Virginia Commonwealth University Health, покажува дека онлајн консултациите со докторите, го намалуваат бројот на откажувања на прегледи за 5 проценти, во споредба со времето пред Ковид 19.
Болниците, кои обезбедуваат онлајн консултации, овозможуваат искуство на пациентите да биде подобро, а ефикасноста во работата поголема. Поради сето ова, трансформацијата на комуникацијата со пациентите, стана дел од развојните стратегии на светските болници.
Еве што вели за тоа познатиот д–р Peter Rasmussen, медицински директор за дигитално здравје и вонреден професор на Cleveland Clinic Lerner College of Medicine: „Мислам дека дигиталната трансформација на комуникацијата во здравството, најмалку е сведена на пренесување на датотеки од печатена во електронска форма, односно од хартија на компјутер. Повеќе се работи за транзиција, од интеракција со пациенти во ординација, до обезбедување на грижа за пациентите во нивниот дом или друга здравствена установа. На многу доктори, им е тешко да ја прифатат таа промена. Но, во човечката природа е тешко да се прифаќаат промените. Сепак, мислам дека е неопходно да се сменат вообичаените начини на комуникација и целосно да се свртиме кон дигитализацијата“.
За светски познатите доктори и експерти од областа на дигитализацијата, процесот е неизбежен, доколку болниците сакаат да продолжат успешно да работат и да ги задоволат потребите на сите пациенти, на кои тоа им е потребно. Докторите, меѓу кои д-р Roy Schoenberg, претседател на American Well во Boston, веруваат дека за да се постигне успешна дигитална комуникација со пациентите треба: (1) јасна стратегија од страна на менаџментот, (2) идентификување на лидерите во прифаќањето на промените и (3) подготовка и ангажирање на персонал.
„Од суштинско значење е менаџментот, да има јасна стратегија за дигиталните услуги. Треба одлучно да им се каже на докторите, дека интеракцијата со пациентите преку дигитални канали е многу важна, во грижата за нив. Исто така, важно е да се постават очекувања, во однос на опсегот на дигиталните услуги, вели Roy Schoenberg“. Втората работа е, да се идентификуваат докторите, кои најлесно и најдобро ги прифаќаат промените и применуваат дигитална комуникација на работа. Д-р Peter Rasmussen вели: „Моето искуство е дека 20% од докторите, безрезервно ја прифаќаат новата технологија и промената во начинот на кој комуницираат со пациентите. Но, за повеќето од нив е тешко. Не се работи за возраста на докторот, туку за желба за прифаќање на иновациите“.
Во истиот контекст, Roy Schoenberg вели дека болниците треба да посветат особено внимание на докторите, кои лесно ги прифаќаат промените, бидејќи тие се добар пример за останатите. „Луѓето кои прифаќаат промени обично се успешни, па другите ќе сакаат да го следат нивниот пример“. Третата работа, се однесува на подготвеноста и ангажираноста на болничкиот персонал. Едноставно, фокусот на докторите и на медицинскиот персонал, треба да биде на подобрување на квалитетот на онлајн услугите и нивната исплатливост. Се разбира, најважно е болниците да се водат од позитивните искуства на пациентите.